الشاعر نجر بن فيصل العصيمي

دفها يا عيد لين يدرجني
لين تمشي من خطرها الله يناجي

لو مشت يومين بالثالث تكني
ماتقضي الوقت معنا باندماجي

ياسنين الماضية لو ترجعني
رجعن شقران حيث انه مزاجي

العوض عقبه سكاريب تحني
ماتجي عرق وراه البيت لاجي

القرنبع ماينشع بالمغني
ماتعدا مزرعة راعي الدجاجي

القرنبع ضيعت فكري وظني
جبتها قبل امس من سوق الحراجي

التواير من ورا مايمسكني
والمواشي من قدم فيها ارتجاجي

والمداقر والرفارف يقرعني
والكويل ما يورد للبواجي

والمكينه كن فيها صوت جني
ينزعج دخانها مثل العجاجي

والسوايل والبريك يهربني
كملت مصرف عيالي بالكراجي

خسرتني مايكف الدين عني
اكلت البيزات مايضحك حجاجي

مثل راس غليص تاكل ماتونى
بيح الماجود ماعندي خراجي

شرية السكراب في كبدي طعني
ماتعدا العرق الاقصى بانزعاجي

مثلها واشكالها مايعجبني
وان مسكت بريكها السكان راجي

مع هذا وانا بعد سايق وفني
مير ماينفع بها كثر العلاجي

ابعدوها يا اهل المعروف مني
واشعلوا في كشنها مثل السراجي