الشاعر نجر بن فيصل العصيمي

احمدالله وارد الستين عانه
واردن قبل الحديد يوردونه

مايعبى من شراب القيز خانه
ولا وقف وسط الكراج يوضبونه

المكينه مطرقن من خيزرانه
والفرامل حبل والسسته متونه

وتايره رجليه يازين ربعانه
كامل بالوصف والشمعه عيونه

والجما كبوت والبوري لسانه
والمساعد ياولد حربة سنونه

والرديتر صرته مضرب بطانه
ديتره يابوسهل مايلحمونه

وان ركب راعيه ما مله مكانه
وان طرش صوب البلد ما يجرونه

وان عطا جو الخلا زين هذبانه
وان تعرض رملة مايسعفونه

نمرته وسمه على خده بيانه
وان وطا له مركزن مايسألونه

وارد الرحمن يازين سهيانه
يعجب اللي فوق وسقه يركبونه

خالقه ربه وخالقنا وزانه
مايورد من بعيدن يصنعونه

مير شان الوقت واقفا به زمانه
وانقطع شقران ياللي ترغبونه

وتم قولي بذكر رب عز شانه
بذكر رب كل الامه يشكرونه