الشاعر نجر بن فيصل العصيمي

بسم رب الناس محيي الميتين
واحدن يمطر مطرها من سماها

ملحق الحيين بثرى السابقين
والبعث عنده على اخر منتهاها

والنصيحه عندنا للسامعين
وان سمعها عاقل يشكر ثناها

ياشباب اليوم صيروا عاقلين
لاتحدون الجنون بمستواها

الجنون بدورهم متخـنفسين
يصعدون الى السما في معتلاها

حاولوا في سمع رب العالمين
لين صار النجم مشهاب ورماها

وانتم اليومه تراكم طايرين
والعقول اللي تشوش من رداها

انتم القدوه شباب المسلمين
استحوا من ملة محدن مشاها

النشاما مايجون مقحصين
وان زبنهم عورتن صاروا ذراها

والنشاما للضيوف مرحبين
تشبع الظيفان في كرمة صخاها

تزعمون بروحكم مثقفين
والثقافه طاعة الله من عطاها

وان سألته عن فعول الاولين
قال مادري بالبلاد ومن بناها

موتره سكراب مشري بدين
والشعر باروكته توه شراها

للحوادث دايما متسببين
كل يوم وشرطة النجده وراها

يزعجون موظفين مجهدين
والمخنفس مادرا على عماها

والخساره كلها للوالدين
خسر ابوه وخسرت امه في غذاها

يوم جوها بالخبر قالوا سجين
صفقت بايدينها عند اقصراها

جت هل المعروف تنخا الطيبين
علمتهم والعيون انهل ماها

وقام جار البيت في دور حسين
واطلعه تحت الكفاله لين جاها

وكل توجيهاتنا للجاهلين
ربمن جهالنا تمنع خطاها

وتم قولي بذكر رب العالمين
واحدن يمطر مطرها من سماها